梁太EQ炒飯 全程無偈傾

【明報專訊】香港有機資源中心噚日喺中環遮打花園舉行「全城有機日2016」，特首夫人梁唐青儀及副食物及衛生局長陳肇始等都有出席支持，兩人更露兩手，即場以有機食材下廚。


唐青儀倡市民屋企種菜

梁太先品嘗一個有機午宴，跟住拍住同場嘅民建聯立法會議員葛珮帆（EQ），煮咗一道「田園粒粒紅米炒飯」。Emily見梁太將有機食材切片時有板有眼，但速度就唔及葛珮帆。之後米飯落鑊，梁太炒咗兩炒就停手，交晒畀主辦單位嘅大廚處理，成個過程冇同葛珮帆講過一句嘢，唔通佢哋太專注煮食？


梁太隨後話，佢都會喺禮賓府內種菜，平日都會用啲純天然食材煮餸，佢仲建議市民齊齊喺屋企種菜。而陳肇始就同民建聯立法會議員何俊賢煮咗一道有機香草鮮茄奄列。