公民黨10周年晚宴 泛民拱照 田少撐場 傑哥從政秘笈：要有好老婆

【明報專訊】今日係公民黨成立10周年，佢哋噚晚喺九龍灣國際展貿中心筵開30幾圍慶祝，宴請各界好友。雖然唯一有邀請嘅政府官員、即財爺曾俊華唔得閒嚟，但係泛民各黨拱照，有前政務司長陳方安生，仲有建制派「壞孩子」自由黨田北俊畀面出席，加埋港鐵行政總裁梁國權捧場，全晚絕無冷場。


黨魁梁家傑（傑哥）今年好大機會唔再選立法會，佢噚晚喺台上回顧過去，話十年人事幾番新，好彩太太Carol一直默默支持，佢先可以堅持到今日。台下出席者包括即將組黨嘅學民思潮前成員黎汶洛，傑哥發表愛妻感言嘅時候，就點名傳授黎汶洛從政秘笈，就係「一定要搵個好老婆」。


披民初裝 高歌「熱血是男兒」

傑哥噚晚成晚都好有興致，更加喺表演環節著民初裝，高唱關正傑嘅《近代豪俠傳》。佢一開始似乎未熱好身，甩咗唔少歌詞，不過唱多幾句之後就上手，歌喉仲相當唔錯，中氣十足。傑哥最後唱到「永垂青史裏，熱血是男兒 」，唔知係咪都想自己喺歷史上留名呢？


公民黨上次黨慶晚宴籌到200萬，噚晚就籌到大約245萬，多兩成有多。其實噚晚有唔少畫作同藝術品拍賣，成績不俗，單係其中一幅《清明上河圖》刺繡，就賣到32萬，至於田少亦相當畀面，以6萬蚊投到公民黨主席余若薇嘅畫作。