勉年輕人 話諸葛亮講英文 講笑冇人笑 CY：爛gag嚟

【明報專訊】特首梁振英（CY）官邸禮賓府噚日開放日，朝早落住雨，但仍有逾百人喺門外等候開放，唔少市民都話係帶仔女嚟賞花，同埋想見吓特首。但CY噚日好忙，頻頻要出席活動，只有喺最後一次返官邸時同市民影吓相。


禮賓府開放 CY來去匆匆

舊年11月開放日時，CY同太太唐青儀專登落樓同多個小朋友傾偈握手，逗留成半個鐘；CY今次就有啲唔同，即使交流，都只係同兩三個市民握吓手、影吓相，之後就話「落緊雨」匆忙離開，過程中冇回應記者提問。


原來CY噚日都有好多官式活動要參加，包括出席國泰「飛躍理想計劃」活動，仲喺活動上「講爛gag」。事緣CY話，佢無活動出席者之一麥潤壽咁風趣幽默，話自己唔識講笑，但都試吓輕鬆啲講話。佢先稱呼國泰行政總裁朱國樑為「孔明」，因為朱國樑讀音似諸葛亮，然後話人類立志要飛，可能係源於諸葛亮曾經同隻雀講﹕「I can fly one day！」呢句英文應該係國泰活動嘅口號，而CY咁講，其實係想鼓勵參加活動嘅年輕人，只要立志「I can fly」，即使經歷好多失敗，但累積經驗知識後，終於可以實現飛行夢想。


女長毛帶「大白象」示威

不過，CY呢個諸葛亮講英文嘅笑話，台下年輕人就唔識反應，仲dead air咗，CY於是就話「爛gag嚟㗎」，兩三秒後台下後生仔先識歡呼。


噚日都有唔少人趁開放日去禮賓府示威，社運人士「女長毛」雷玉蓮帶同黃傘及象徵高鐵嘅陶瓷「大白象」，批評政府花公帑起高鐵，但唔肯改善醫療服務。佢其後高叫口號，並擲碎「大白象」，但在場嘅警察樂隊奏樂，就遮蓋咗佢叫口號。市民黃伯同「香港歸英運動」成員區先生，則分別展示寫有「我要真普選」黃色毛巾及英國旗圖案嘅遮。