乳鴿鄺俊宇 小說變電影

【明報專訊】民主黨鄺俊宇（Roy）以寫愛情小說出名，有見幾本著作都暢銷，阿Roy噚日出席傳媒聚會時，就透露有意食住上，進軍影壇，不過就唔係領銜主演，而係喺幕後度情節。阿Roy話，套戲會以自己嘅小說做藍本，有望年底開拍，講一個女記者同男攝影師穿越時空嘅愛情故事。至於心水選角，阿Roy話有意喺台灣同香港各搵一個新晉演員擔任男女主角，人選未定，不過，唔知阿Roy係咪要顧及形象，話性感女星可免則免。佢又話，穿越時空情節要用好多特技，嚟緊相信要花唔少腦筋，希望唔會得一個廠景，否則就會悶親觀眾。


阿Roy早前表明有意參選立法會超級區議會議席，佢嘅小說吸唔吸到選票仲係未知數，但佢同Emily講，話覺得現階段有意參選超區嘅泛民，都應該舉咗手先，之後點協調可以從長計議咁話。