梁天琦內地出生 鄭松泰：無排拒內地人

【明報專訊】喺立法會新界東補選打「中港區隔」旗號嘅本土民主前線梁天琦，補選後喺一篇網媒專訪入面承認母親係新移民，其後喺另一場合坦言自己唔喺香港出世，引起網上唔少討論。本民前近日喺facebook上幫梁天琦解畫，話一個人係咪香港人「唔係用血統區分」，而係「用文化同愛嚟區分」，又用入籍香港嘅港足韓裔教練金判坤做例，話係咪香港出世呢個論點，「到而家都仲講，好悶呀大佬」。


有本土派人士成日反對內地人來港，網上會叫人哋係「蝗蟲」，仲有人搞「光復行動」；不過，同屬本土派陣營嘅熱血公民鄭松泰，噚日出席《城市論壇》後亦回應「血統論」，話出生地唔係討論重點，仲話內地出生人士嚟到香港，肯尊重香港民意權益，同時「服膺」本地文化同價值觀，咁內地嚟都係香港人喎！

唔少本土派一直提倡限制新移民來港，不過鄭松泰就解釋，討論焦點一直都係爭取香港攞番單程證審批權，「唔係話要攞番單程證審批權，就係排拒大陸人」，亦「唔係唔畀大陸人嚟」喎。