屆退休齡 警隊兩副處長延任

【明報專訊】警務處噚日公布，今年4月及5月屆57歲退休年齡嘅副警務處長（行動）黃志雄及副警務處長（管理）周國良，獲延任半年及一年。黃志雄任期屆滿日由原來嘅4月16日延至10月16日；周國良由今年5月7日延至2017年5月7日。警方話延任以便警隊順利交接。


Emily聽警隊中人分析，今次延任安排反映新一哥盧偉聰想睇定啲，警隊管理層嘅部署或有別於前一哥曾偉雄嘅睇法，長遠警隊管理層「七小福」（高級助理處長級或以上7名高層）班底，或有變化。喺今次新變動，最直接受影響應該係行動處長劉業成，過去內部一直話劉業成會接替黃志雄出任副處長，家最少要等多半年。


盧偉聰至2019年11月屆退休年齡，警隊中人分析，下任一哥誰人接任仍未明朗，暫時大熱門包括4名助理處長﹕李建輝、郭蔭庶、劉賜蕙及鄧炳強。