建制派老竇幫促膝談湊仔

【明報專訊】新任爸爸嘅工聯會立法會議員郭偉強，前日終於接咗上月25號出世嘅阿仔返屋企，佢無請陪月，同太太一腳踢照顧囝囝。BB出世時有7磅幾，郭偉強話BB就算喊，佢都笑住應對，因為真係開心事，不過呢幾日兩公婆無覺好瞓，尤其初出世BB要較頻密餵奶，未來要安排輪休。


知道郭偉強咁嘅情况，民建聯立法會議員陳恒鑌就安排專業諮詢服務，陳恒鑌噚日喺facebook話，知道郭偉強通宵為BB「服務」後已露出疲態，咁啱遇到有多仔公之稱嘅民建聯鄭泳舜喺立法會，即刻安排佢分享湊仔經，因為鄭有3個仔，經驗十足。陳恒鑌自己就當溫故知新，同時做好心理準備，因為佢已經唔記得之前湊女嘅細節；佢仲捉埋民建聯何俊賢嚟聽，鼓勵佢努力做人，加入好爸爸陣營咁話。