有話說﹕收起「父母十大壞習慣」

【明報專訊】Mama早幾日坐港鐵，喺調景嶺站往觀塘線嘅月台，目睹一幕奇景。話說當日係周末下午，都幾多人等轉車，有一個估計讀緊四、五年級嘅男仔，一直企到最前，成個人幾乎貼住塊玻璃幕門。正當Mama擔心佢企得太前有危險時，列車駛入，玻璃幕門打開，呢個男仔就一支箭咁衝入車廂，然後大字形攤開雙手，仲將佢整條腿橫放喺一列空椅上「霸位」。


呢個時候，有一對年約四十歲嘅夫婦亦急急腳坐埋男童身邊，好明顯，佢哋係呢個細路嘅父母，坐低之後就笑到四萬咁口，大大聲讚個仔「叻仔」、「醒目」。當刻，Mama真係睇到目瞪口呆，心諗呢啲唔係叫醒目，而係叫「肉酸」、「失禮」。


Mama相信，絕大部分正常嘅父母，都唔會叫仔女作奸犯科，之不過父母嘅價值觀、家庭教育，就好影響一個小朋友嘅成長。Mama早幾日睇facebook，見到文化教育機構「香港有品運動」嘅一篇文章，好發人心省。文章講到，孩子好多時出現偏差行為，原來往往係由仿效父母開始，其中父母十大壞習慣，最容易影響細路哥，包括﹕


1、用粗言教訓孩子﹕如果父母經常大大聲，甚至用粗言穢語斥責仔女，仔女長大後只會有樣學樣，唔識得尊重人。


2、不能以身作則﹕做父母最忌講一套做一套，教仔女要自理，但自己就亂七八糟，乜都叫工人執手尾，咁小朋友又點會聽呢？

3、缺乏公民意識﹕假如父母喺無警察嘅情况下，就隨地丟垃圾、亂過馬路，小朋友會以為，只要無人監視，乜都做得！

4、不投入家庭時間﹕父母喺仔女面前成日做低頭一族，又或者只係顧住睇電視，久而久之，小朋友都會對家人、周遭嘅事漠不關心。


5、三分鐘熱度﹕做事虎頭蛇尾嘅父母，仔女一定學到足，所以千祈唔好成日將「放棄啦」、「做唔到㗎喇」之類嘅說話掛喺口邊。


6、不尊重別人家的規則﹕父母去親朋戚友屋企，亂開人家嘅雪櫃、亂攞人家嘅物品使用，絕對係錯誤示範，教壞細路。


7、經常說「不」﹕經常say no，乜都話唔得，但又唔講清楚乜先係得嘅父母，只會逼到細路轉為進行「地下活動」，到時你就知驚。


8、打斷別人談話﹕想小朋友有禮貌，唔好亂插嘴，父母首先要戒咗經常打斷人講話嘅壞習慣。


9、與別人比較﹕做父母，好容易有意無意將自己嘅細路同人比較，咁樣有機會令小朋友內化成自己嘅行為準則，長大後做事會輕易受其他人影響。


10、講不切實際的話﹕「不聽話，警察會嚟捉你！」、「唔聽話，爸爸媽媽就唔要你。」想小朋友身心健康，做父母嘅，就要杜絕產生精神垃圾。