為楊助選 黎汶洛退出學民

【明報專訊】泛民支持者對於今次補選撐公民黨楊岳橋定本民前梁天琦，有熱烈討論，學民思潮早前就發聲明，話召集人、發言人都唔會表態，而前發言人黎汶洛（Oscar）雖然現時只係普通成員，但佢全力撐楊岳橋，噚日仲全天候貼身同楊岳橋四圍去拉票。由於自覺身分敏感，所以佢前日凌晨決定退出學民，以確保學民中立性。


錢詩文fb撐梁天琦

Oscar強調學民無內訌或分裂，形容「每個同學都有自由表達意見權利」。佢話學民思潮中曾有人挽留佢，但為免損害組織中立性，令人感覺組織喺今次選舉「各打五十大板」，故仍決定退出。佢大讚楊岳橋為人有承擔，喺大是大非上應該清晰表態。


Oscar話，學民思潮召集人黃之鋒尊重佢退出嘅決定，又話佢雖然退出學民，但仍會繼續同之鋒、周庭等人組黨，預料4月中下旬成立。至於黃之鋒嘅女友錢詩文，就喺fb上載6號圖案，留言話以個人身分支持梁天琦。