為見華仔 內地人製「山寨邀請函」

【明報專訊】演唱會炒黃牛飛小琴聽過，但邀請函都有得炒就真係第一次！內地梳化股敏華（1999）首席財務官王貴升噚日喺傳媒午宴上話，之前公司舉行發布會時，代言人劉德華亦在場，而發布會需要出示邀請函先可以入場。唔知係咪華仔太吸引嘅關係，當日竟然有人喺場外出售「山寨邀請函」，連信封都抄得似模似樣，仲炒到過千蚊，希望可以渾水摸魚見天王一面喎。


不過，王貴升話，入會場前要通過安檢，而且邀請函仿真度亦唔算太高，基本上一眼就分到邊啲係「真．邀請函」！簽得華仔代言，梗係要充分利用華仔嘅名氣刺激銷量，公司喺紅星美凱龍（1528）旗下商場分店，擺咗華仔紙板公仔，希望顧客見唔到華仔真人，都可以吸引佢哋同公仔合照。內地人咁冧華仔，小琴有啲擔心啲人集完郵後，開心到唔記得入去睇梳化。


[小琴密語]