長毛送「天秤」 財爺讚手工好

【明報專訊】社民連梁國雄（長毛）喺立法會不時離開座位衝向官員「埋身」交鋒，多數都不歡而散。不過，財政司長曾俊華噚日出席財委會會議，回應有關預算案嘅提問，長毛喺會議中段入場，直接行去財爺度，將一塊請願道具交畀財爺，其間無衝突、無嗌口號，兩人笑笑口之餘，財爺更加心情大靚，當面讚對方「你啲手工真係做得愈嚟愈好」。


長毛今次嘅示威物係一個天秤，一邊係飛機、一邊係老人家圖案，代表政府只肯畀錢起機場三跑，但唔做全民退保，中間就係財爺嘅頭像。長毛遞道具後一度畀保安攔住，之後佢乖乖行返座位，會議照常舉行。


形容係「藝術品」 但未入得M+

財爺之後回應其他議員發言時，再次讚長毛嘅道具，話對方嘅手工確實有進步，又形容係「藝術品」，雖然未入得M+（西九文化區藝術館），但就勉勵長毛「可以慢慢繼續努力」。