補選論壇 周浩鼎「為港流淚」

【明報專訊】仲有兩日就係立法會新界東補選投票日，無綫電視噚晚播出選舉論壇，選舉日臨近，論壇火花四濺，不時出現各候選人「互片」情况。唔知係咪因為民建聯周浩鼎近期形勢大好，令佢成為被圍攻對象，去到論壇後段，周浩鼎突然哽咽流淚，並提到自己信主（天主教徒），話雖然大家爭拗得咁犀利，但希望7個候選人之後「都可以做番朋友」咁話。


話說喺最後辯論階段，公民黨楊岳橋強調拉布有用，周浩鼎以沮喪聲線話自己已經無乜氣，唔想同大家爭拗，隨即話大家企喺度都係為香港。點知佢愈講愈感性，話自己信教，大家都係主內弟兄，希望大家爭拗後可以做番朋友，相信坐埋一齊，香港可以繼續行、做正經事咁話。佢更加同佢口中嘅「暴徒」、本土民主前線候選人梁天琦講，雖然唔認同對方理念，但「天琦，你返嚟啦」，大家可以一齊傾咁話。


仍未答是否支持梁連任

不過，論壇期間周浩鼎其實都幾處於捱打狀態，新思維黃成智問佢究竟係咪支持梁振英連任，又質疑民建聯同梁振英，其實係「無民主嘅害港聯盟」。周就話要等到特首選舉時齊晒所有候選人，有得比較先表態，但就被楊岳橋話佢「呢啲咪騎牆囉！」周就只肯表態話，如果公民黨出一個梁家傑（選特首），「我一定唔支持佢」。


是次選舉其他候選人還包括方國珊、劉志成、梁思豪。