陳恒鑌又做老竇 自製薑醋汁唔合格

【明報專訊】民建聯陳恒鑌（Ben）噚日趁元宵節邀請傳媒聚餐，Emily到場後未見菜式，先見枱上有3盤豬腳薑。原來阿Ben喺3月將會迎來第二個BB，所以趁老婆未生，先試吓用3種唔同嘅醋整豬腳薑，畀傳媒品嘗後「投票」，再揀用邊隻醋咁話。不過阿Ben始終唔係大廚，佢自製嘅醋汁就不幸得到全場最低分，不敵兩個大牌子嘅出品。


阿Ben無透露BB性別，但話原來連佢媽咪都未知，笑言擔心講咗畀阿媽聽，阿媽會日日向新抱建議生仔應該食乜、生女又應該食乜，老婆就會吃不消。


已經有一個6歲大囡囡嘅阿Ben分享湊女經，話自己已變成「兒科醫生」，因為6年嚟處理過阿女嘅大小病痛，例如發燒要幾時用高燒藥或者低燒藥就瞭如指掌。佢又話，有次囡囡入咗醫院，妻女一齊喊，講笑話湊女分分鐘難應付過議會工作。


阿Ben話，有晒以上經驗，嚟緊照顧第二個小朋友應該更得心應手，又講笑話個女都想幫手湊BB。