希克藏品展 編年看近代中國

【明報專訊】西九M+博物館預計2019年開幕，Emily記得西九管理局喺2012年曾購入及獲捐贈1510件希克藏品，呢批藏品展示咗唔少敏感嘅中國當代藝術作品，但一直未喺香港公開展出。想先睹為快嘅市民有機會喇，因部分希克藏品今日起會喺西九搞嘅「M+希克藏品：中國當代藝術40年」展覽亮相，共展出50名藝術家超過80件作品。


Emily知道今次係首次用前衛嘅編年時序策展手法，分3個時序篇章，帶大家返去1974至2012年嘅中國，睇睇當時嘅藝壇發展，包括地下藝團、冷戰後受西方思想影響嘅激進實驗作品等，當然唔少得有艾未未嘅作品。


西九管理局M+希克高級策展人（視覺藝術）皮力認為，展覽提到文革、經濟開放、六四事件，可以幫呢一代唔熟中國歷史嘅年輕人，了解中國歷史同文化。今次展覽將直至到4月5號，由朝早11點至夜晚8點，喺鰂魚涌太古坊ArtisTree免費展出，並獲瑞信作為主要贊助機構，太古地產贊助場地。