廠商會組團考察中亞絲路 8日訪5國

【明報專訊】一帶一路成為國策，除咗特區政府不斷講，商界都唱好，廠商會會長李秀恆噚日喺新春團拜上話，嚟緊4月會組團去中亞「絲綢之路」考察團，8日拜訪5個國家，好似哈薩克、烏茲別克、吉爾吉斯等，了解投資環境同機遇。


李秀恆話，佢哋組團都遇到唔少困難，皆因去呢啲地方需要拎簽證，但大部分國家喺香港原來都無領事館，佢話好彩外交部駐港特派員公署都幫手佢哋搞簽證。


陳永棋談亞視：好心酸

廠商會每年搞工展會都好成功，李秀恆話，正籌備3月底喺澳門首次搞澳門工展會，8月會喺內地搞大連工展會。


另外，全國政協常委、廠商會永遠名譽會長陳永棋新年同屋企人坐郵輪出外玩，近日先返香港，棋哥曾經做過亞視股東，噚日講起亞視嘅情况就話好心酸，又話留守亞視嘅員工百分百值得敬重。但佢就強調自己完全唔識家嘅股東，又唔肯多講出糧等問題，話免得要開口鬧人咁話。