下周一起高清翡翠台改名 無綫J5黃金時段齋播普通話

【明報專訊】下星期一開始，無綫會更改節目頻道，81台翡翠台會變成高清台，而85台高清翡翠台會變身「J5」台。無綫就宣傳J5台會係一條「全新財富與知識頻道」。Emily就望下首播當日有咩節目，點知就發現由夜晚8點半開始，一路直落嘅係普通話新聞、普通話財經報道、普通話天氣報告，同埋普通話新聞檔案，跟住嘅仲有《發現大絲路 III》同埋《畫中國》。


Emily見到唔少網民都對J5台嘅節目安排好有意見，有網民就留言話無綫「再次用行動證明自己係CCTVB」，又有網民拎埋亞視出嚟講，話無綫「下星期開始，已經全面取代亞視，正式大陸化」。


曾醒明﹕一向有普通話新聞

無綫企業傳訊部副總監曾醒明就同Emily講，無綫一路都有普通話新聞喺明珠台播，嚟緊希望可以加強普通話新聞嘅服務，因為香港同兩岸四地嘅接觸愈來愈多，來自內地、台灣等地嘅朋友未必識聽廣東話新聞，又強調無綫已經有互動新聞台，24小時播廣東話新聞已經好足夠。


至於其他節目嘅選擇方面，曾醒明就話J5會蒐羅世界各地嘅節目，日劇、韓劇、台劇、內地劇等都會有，至於本地製作就可以睇翡翠台囉。