回顧40多年足迹 阿基感謝會 惜別深水埗

【明報專訊】民協馮檢基（阿基）早前喺區選落選，雖然唔可以競逐連任下屆立法會嘅超級區議會議席，但就表明會考慮出選九龍西以外嘅直選選區。離別深水埗在即，阿基趁歲晚，噚日喺當區搞咗個「社區情」回顧感謝會，同大約40個公公婆婆分享以往工作點滴。62歲嘅阿基話，40幾年前揀喺深水埗工作，係因為想為呢個當時全港收入最低嘅地方改善民生，多年以嚟留下唔少腳印，雖然今日惜別，但「天下無不散之筵席」，希望日後再聚咁話。


棄選立會 卿姐：黨內有能者唔止我

有政壇老將打算轉戰他處，亦有人選擇退落嚟。早前講明唔選下屆立法會嘅民主黨主席劉慧卿（卿姐），噚日接受商台節目訪問，就話唔選唔係因為驚輸，「唔係誇口啦，我選係唔會輸嘅」，而係黨內有能力嘅唔止佢一個。


卿姐話自己已經做咗7屆立法局同立法會議員，係時候換跑道，但強調即使退下議會，「政治上永遠唔會拜拜」，自己會不停為社會同國家服務，例如搞好「一國兩制」。行政立法關係近年惡化，不過卿姐就話自己雖然願意同任何人傾，不過既然退得落嚟，將來就唔會代替議員喺議會外解決呢個問題喇。