做足20年 92歲婆婆奪終身義工獎

【明報專訊】噚日「傑出生命計劃」舉行「香港義行日2016」，仲頒發咗首屆終身成就長者義工大獎。Emily同其中一名得獎者、92歲嘅蘇婆婆傾過，佢話幫完人嘅滿足感，係咁多年嚟支持自己參與義務工作嘅動力。


蘇婆婆已經做咗義工20年，平日除咗會義賣籌款，協助院舍接待訪客外，亦會陪其他長者去醫院覆診，甚至講故事鼓勵其他長者樂天知命，自言係好多長者眼中嘅「開心果」，每次聽到其他長者感謝自己，佢都會心微笑。不過，蘇婆婆近年身體漸漸變得虛弱，出街有時要以輪椅代步，但佢仍堅持每個禮拜有3日探訪獨居長者。蘇婆婆話，只要可以幫人，就完全唔會覺得辛苦，認真厲害。