會唔會有女特首？ 林鄭﹕有葉太

【明報專訊】噚日有報章刊登政務司長林鄭月娥訪問，林鄭話唔會去選特首，其實佢前日參加自由黨青年團嘅Social Wednesday活動，都已經有年輕人問佢選唔選，同埋香港幾時會有第一個女特首，林鄭就無具體答佢想唔想做女特首，但有與會者就轉述，話林鄭當時講笑話唔使擔心香港無女人做特首，因為仲有葉太（葉劉淑儀）！

自由黨青年團邀阿叻交流

自由黨青年團前日喺立法會搞閉門聚會，邀請林鄭做嘉賓，大家傾咗大約1小時，而林鄭當然唔放過機會簡介施政報告提出嘅工作，硬銷下「一帶一路」。不過，大家除咗關心政府政策，當然乘機八下特首選舉行情，但林鄭回應就避重就輕。


青年團主席李梓敬同Emily講，大家同林鄭見面無設定議題，純粹等青年人同司長傾下交流看法，而佢哋下次嘅嘉賓都係話題人物，就係藝人陳百祥（阿叻）。Emily就認為，如果學民思潮黃之鋒都報名參加，咁節目仲精彩。