月尾民間美食車大匯演 單車改裝變身美食車

【明報專訊】政府之前推出美食車政策，仲估計「入場費」大約要60萬，有團體之前就提交咗「民間美食車計劃書」，提議一啲比較平民嘅方案，不過政府似乎唔太接受。多個民間團體，今個月31號就諗住喺銅鑼灣東角道搞個「平民美食車大匯演」，展示一啲佢哋設計嘅美食車，仲話會即場煮嘢食派街坊。


呢啲「平民美食車」設計同規格都各有不同，除咗輕型及中型貨車改裝嘅美食車，仲有傳統嘅手推車同埋單車改裝「Cargo Bike」。有份設計美食車嘅設計師陳嘉興話，佢哋設計嘅美食車價錢可低至千元，而且同樣美觀、有特色，仲可以符合衛生要求。


陳嘉興認為，政府可以因應售賣食物嘅種類，對美食車訂立相應要求，令更多市民都有機會參與營運，等美食車可以更多元化。