保母錯用慢燉鍋 徐英偉屋企險火燭

【明報專訊】育有兩個小朋友嘅民政事務局政治助理徐英偉（Caspar），前晚喺faceboook話，「屋企唔要熱廚房，今日大出血買定啲救火工具！」原來佢屋企前晚差啲火燭，好彩咁啱放工返屋企趕得切救火。


誤放爐頭開火煮

Caspar話佢請嘅保母前晚將一個慢燉鍋（slow cooker）直接放上爐頭開火煮，好明顯工人係唔知乜嘢係慢燉鍋喇，結果梗係出事搞到起火，爐頭燒黑，屋企差啲火燭，好彩徐英偉咁啱放工返到屋企，趕得切救火，家人亦無受傷。


Caspar同Emily講，佢梗係唔會因為事件而炒工人，反而教佢哋防火知識及遇火警時點處理先更重要，所以前晚已即時同家人上咗家居防火堂，又計劃今個禮拜同家人試玩一次火警演習。


翌日即買滅火裝備

Caspar前晚喺fb上載「熱廚房」照片，仲問大家邊度有得買滅火筒同滅火氈，即刻有朋友教路，而佢行動迅速，噚日就去灣仔添置滅火裝備，以策安全。


Caspar緊張好正常，畢竟仔細老婆嫰，都係安全啲好，大家都不妨學吓佢，喺屋企做防火演習。