創科局搵人 楊偉雄﹕無困難

【明報專訊】今年《施政報告》除咗一帶一路之外，另一重點落咗去新開嘅創科局，至今創科局差唔多成立咗兩個月，局長楊偉雄噚日被傳媒問到，點解到家都仲未有副局長同埋政治助理嘅人選，楊偉雄回應話「就快公布」，又話家正係「跑程序」，強調搵人並無遇上任何困難。


副局政助「就快公布」

Emily睇番之前啲報道，有傳過創科局副局長會由即將退休嘅警務處通訊科高層、警隊總電訊工程師黃振球擔任；至於政治助理就暫時未聽到有乜風聲。


對於施政報告提出設立20億元嘅「創科創投基金」，楊偉雄解畫話基金並唔係本港首創，外國都有推行，希望基金運作後可以令業界創投資金流動更暢順。佢又話，現時仲討論緊創科局嘅撥款申請有無需要斬件，抑或一次過向立法會申請，又話首要工作仍然係同公眾解釋清楚政策方向，之後會同立法會議員、學校等唔同持份者溝通。