劉鳴煒防水外套贈女健兒 自己「落湯雞」著女裝

【明報專訊】渣打馬拉松噚日舉行，平時都玩開運動、早前喺港台一個節目被選為「男神」嘅青年事務委員會主席劉鳴煒，以及一眾名人，噚日都有落場跑，劉鳴煒事後喺facebook上載唔少相片，包括佢著住一件睇落幾窄身細件、好鮮色嘅風褸。原來噚日比賽期間傾盆大雨，鳴煒見有個女仔無穿防水風褸，就主動將自己件黑色防水外套送畀呢個女仔，個女仔就將自己身上嘅女裝細碼、粉紅色、無帽又唔防水嘅褸，畀咗鳴煒。唔少人都讚鳴煒勁有風度。


范國威：無跌倒已好感恩

本身都有跑開步嘅鳴煒，用咗1小時48分完成10公里賽事，睇落似乎都好慢，其實鳴煒可以話係用心良苦，皆因佢同近20個青年事務委員會委員、職員齊齊跑，鳴煒事前已講明，大家要盡力跑，佢點都會陪住跑得最慢嘅一齊跑，即使跑到被巴士接走，佢都會陪住，唔會留低人哋自己跑咁話。


除咗青委會，都有唔少名人參與今次賽事，好似立法會議員范國威（Gary）、馮檢基等。Gary話自己用咗約70分鐘完成10公里賽事，佢形容未起跑已經由頭濕到落腳，時間同往年差唔多，但佢話自己無因為天雨路滑跌倒已經好感恩。