「重返」1920年代舊香港 復古電車穿梭上環銅鑼灣

【明報專訊】香港電車有限公司將喺本月24號推出全新嘅「電車全景遊」觀光旅程。Emily噚日去睇過架復古觀光電車，車身仿1920年代設計，上層採用開放式，下層係懷舊古典車廂，最多可載36個乘客，每日會有6班車來往銅鑼灣同上環西港城。


旅程一小時 每日6班車

喺一小時嘅觀光旅程入面，乘客可以聽語音導賞，會有香港城市面貌變遷同景點介紹。另外，仲可以到佈置舊時電車照片、不同年代電車模型嘅「懷舊角落」參觀。


香港電車董事總經理魏文同Emily講，復古電車斥資幾百萬製造，預計需幾年至可以回本。佢話，車長同服務員全程都著住制服，務求令乘客有回到舊時嘅感覺。


「電車全景遊」套票附有一張黃金車票，乘客可搭觀光電車一次，同埋可以喺兩日內無限次乘搭一般電車。套票價錢成人95蚊，長者及4至11歲小童65蚊，車票喺hktramways.com發售。