險死唐狗女獲領回 開心食瞓玩

【明報專訊】漁護署上月22日喺元朗捉咗隻4至5個月大嘅唐狗女，原本話獸醫評估後認為不宜領養，要人道毁滅；好彩後來狗主出現，噚日將狗女帶走，狗女逃出鬼門關後，仲開心食瞓玩。


民主黨元朗南屏區區議員黃偉賢陪同女狗主一齊去漁護署領狗，原來狗女叫做「黑妺」，當時只有狗主入去同狗女相認，狗主事後形容「黑妹縮埋一角，好驚咁款，直頭吠都唔敢吠」。


黃偉賢話黑妹變得好瘦，可能被捉後驚到食唔落嘢，「狗主帶咗啲肉粒畀佢，即時食晒」。領狗後，黃偉賢亦帶咗肉粒做見面禮，黑妹亦食埋，「黑妹仲肯畀我抱，表現得好驚，但無攻擊性」。家黑妹由黃偉賢暫時照顧，同屋其他狗狗熱情招呼，黑妹當堂開心晒，食得瞓得。黃偉賢希望經此一役，署方可以檢討對待流浪狗手法，唔好輕易殺狗。