施政報告小統計 261段宏圖 54字講退保

【明報專訊】特首梁振英（CY）噚日發表2012年上任以來最長篇幅嘅施政報告，用咗261段講述政府未來大計，比起過往3年都用大約200段長得多，有人統計CY總共47次提到「國家」、約40次提到「一帶一路」，但全城關注嘅退休保障，只係用咗54字呼籲市民畀意見就算。梁振英又喺報告特別講到會研究增加長者過馬路嘅綠燈時間，同繼續喺公廁設置防滑地面同自動感應水龍頭，難怪有議員形容堂堂嘅特首施政報告，內容瑣碎似區議員嘅報告。


4次被打斷發言

梁振英噚日喺立法會用咗近兩個半鐘發表佢第四份施政報告，唔知係咪擔心講到口水乾，宣讀中途加插咗一個10分鐘小休，唔少議員同官員都趁機入前廳食嘢同休息，但梁振英就無入埋一份。CY宣讀報告期間先後4次被打斷發言，社民連梁國雄、工黨李卓人、人民力量陳志全同陳偉業，分別因為播放聲帶或高聲呼叫，被主席曾鈺成趕離場，但今年就無議員投擲物件或者衝向特首。


「你電視台有錢捐大學 我即介紹」

另外，now電視新聞早前引述消息話梁振英喺一個私人場合上，叫商界唔使捐錢畀本地大學。now一名記者噚日喺施政報告記者會問梁振英，點解唔喺施政報告呼籲商界資助大學科研；梁振英聞言就笑住回應，「如果你電視台有錢捐畀大學，我今日即刻就介紹你畀間大學」，又話如果社會有人捐錢，佢第一個贊成，但就始終無承認或否認有無喺私人場合講過有關說話。