勞工界郭偉強 拒評張建宗

【明報專訊】立法會勞工界議員郭偉強噚日約咗Emily同一班行家茶敘，佢已做咗人力事務委員會主席幾個月。社會對於標準工時、取消強積金對冲機制、劃一假期等勞工議題都好關注，工聯會仲搞咗個2015年勞工新聞選舉，大家當然趁機請郭偉強為勞福局長張建宗過去一年工作評吓分啦。


但郭偉強就拒絕評分，只係重複話局長「未去到、未去到、未去到『好』」，佢考慮咗好耐，都係話要留啲空間畀政府，所以唔會評佢哋唔及格喎。不過佢就透露，勞工界未來唔會參與標工會第二輪諮詢，除非商界肯喺之前做咗經濟影響評估嘅28個情景中擇一立法啦。


嚟緊立法會選舉，勞工界功能組別都要夠鐘換人，大家都關心郭偉強會出戰邊區直選，佢就話自己個個區都有落，到時睇工聯會安排，又話自己要求唔係好高，不論工聯會安排邊區都會去選。