民主黨公民黨組團睇台選戰 議員請假唔開會

【明報專訊】四年一次嘅台灣總統選舉今個星期六（16日）舉行，雖然外界覺得今次選舉無乜火花，但對絕大部分無得投票選特首嘅港人嚟講，台灣大選仍有吸引力，對於政黨而言，更加不忘去取經，了解吓台灣政黨點樣搞選舉。Emily聽聞，民主黨、公民黨都會組團去台灣觀選，當中包括唔少立法會議員，都唔開會請假去台灣走一轉。


民主黨單仲偕（單雞）話，該黨有10人會去，佢同立法會議員涂謹申、黃碧雲都會參與。行程由台灣機構安排，佢哋將會星期四出發、星期日返港，初定國民黨、民進黨嘅造勢晚會都會出席，又會拜訪吓台灣嘅智庫組織等。星期四立法會將會舉行特首答問大會，星期五有財委會同工務小組，但單雞話相信佢哋3人到時都已出發去台灣，未能出席有關會議。


慢必大嚿留守立會

公民黨亦會有11人去觀選，由黨魁梁家傑同副主席陳淑莊帶隊，但立法會議員得傑哥一個去。喺議會拉布嘅人民力量，主席袁彌明亦會帶團去觀選，但陳志全同陳偉業兩人就要留守立法會，相信就去唔到喇。陳志全話原本好想去趁熱鬧，仲諗過周五晚開完財會先趕搭夜機，但最後都係去唔到。


至於民建聯，Emily聽聞佢哋無組團去觀選，但個別人士自己都會去，好似立法會議員陳恒鑌，聽聞現已身在台灣。