公布92政府2015上半年索資料次數 港府去年向fb索239用戶資料

【明報專訊】唔少人鍾意喺facebook同朋友分享生活點月，fb公布2015上半年92個國家或者地區政府要求索取用戶資料嘅次數，香港特區政府半年內提出咗71次要求，涉及239個用戶，索資料次數排第30。拎得最多嘅係美國政府，半年內提出17,577次，涉及26,579個用戶，數字幾得人驚；中國內地就一次都無。


美國最多 中國一次都無

翻查過去報告，港府2014年全年只提出59次要求，涉及89個用戶，即2015年上半年涉及嘅用戶，已經係2014年全年嘅2.7倍。而2013年全年特區政府就提出26次要求，索取327個用戶嘅資料。


報告無列出各地政府索資料嘅目的，但總括而言，大部分有關盜竊或綁架等刑事案件。fb補充，每次收到索取資料要求，都會考慮法理依據，若索取資料嘅範圍太闊、缺乏法理依據，或者目的模糊，就會拒絕。