本土派培僑灑溪錢要求陳志興道歉

【明報專訊】噚日facebook瘋傳一張疑似培僑中學通識科教師、香港培青社主席陳志興喺fb發布粗言穢語嘅cap圖，用字好粗俗，但亦都流傳一張署名為「陳志興Frankie Chan」嘅「嚴正聲明」，話自己從來冇喺facebook以「陳志興」開account，佢本人亦「從不會使用粗言穢語留言」。Emily就同咗培僑中學校長招祥麒求證，佢話個account唔係陳志興開，又話識咗佢八九年，「都冇聽過佢講粗口」，同埋陳已經報咗警，仲話保留法律追究權利。


培青社陳志興否認fb爆粗

雖然話個account唔係陳本人，但培青社平時成日「幫手」懸紅緝兇，早排仲喺「香港培青社」個page度揶揄之前失蹤、但前日證實意外死亡嘅本土派活躍人士蔡維益，一班本土派人士噚日就去培僑灑溪錢，要求陳交代同道歉。