「馬騮咁樣」蘭花 送羊迎猴

【明報專訊】農曆新年就快到，「蘭花大王」楊小龍又有應節搞作，帶咗嚟自南美洲嘅「猴面小龍蘭」畀大家睇，呢種花好得意㗎，開咗之後個樣好似馬騮，真係可以用嚟送羊迎猴。


「蘭花大王」幫啲蝴蝶蘭改咗好好意頭嘅名，例如：「吉猴報喜」、「金猴盛世」、「黃金滿屋」、「八方財進」等，唔少仲有個「金」字，呼應花色，不過，啲花其實就唔係真係金色嘅，有啲係淺黃色，有啲就係橙橙哋，睇落都真係幾特別。


$1開運蘭花限量100棵

最吸引Emily嘅就係嚟自南美洲嘅過江龍「猴面小龍蘭」，雖然佢朵花得兩厘米，仲細過粒指甲，但睇得仔細啲，佢個花蕊真係成隻馬騮樣咁，擺喺隻「O嘴」嘅猴子擺設隔籬，真係相映成趣。不過，呢款蘭花就無得賣，想睇嘅可以喺23號起，去東港城室內年宵市場，個花市仲有$1開運蘭花賣，限量100棵。