新思維籌款晚宴上齊走後門 CY攜官員示範「第三條路」

【明報專訊】倡議行政治「第三條路」嘅新思維，噚日舉行籌款晚宴，筵開30席，政商嘉賓星光熠熠，特首梁振英、政務司長林鄭月娥，同譚志源、張雲正、陳茂波3個局長都有到場，立法會主席曾鈺成同幾個外國總領事館代表都出席支持，商界就有中原集團主席施永青同富商林建岳等。不過，中聯辦無派代表嚟，一眾高官影完大合照後齊齊走「第三條路」喺後門離開，留低政制及內地事務局副局長陳岳鵬坐喺主家席。


輕易籌得超過200萬

新思維主席狄志遠（阿狄）致辭嗰陣，形容自己係傻人，因為中間路線係最難行，又用美國已故民權領袖馬丁路德金嘅名句「I have a dream」，形容新思維成員都係「發緊夢」。全國港澳研究會副會長劉兆佳曾經講過香港唔會有「第三條路」，不過阿狄話之後有搵對方傾過偈，覺得對方講嘅係正常人無得行，不過傻人行就路路暢通咁話。


阿狄之後同Emily講，話晚宴籌款目標係200萬，噚晚淨係賣枱已經籌到60萬，Emily見晚宴上嘅拍賣環節，現場踴躍叫價，淨係一幅名畫已經賣到48萬，加上歌手關心妍獻唱《愛是不保留》娛賓，結果輕易超過預期籌款額。


民主黨副主席羅健熙同幾名黨員噚晚都有現身，新思維執委嘅黃成智同Emily講，話好高興幾個前黨友捧場，覺得大家唔使做到咁敵我分明。