盛智文「陰魂不散」 客串宣傳哈囉喂

【明報專訊】時辰又到，海洋公園重槌出擊「哈囉喂」15周年活動，舊年離任嘅前主席盛智文繼續「陰魂不散」，同粉墨登場嘅黃夏蕙（夏蕙BB）齊齊客串限制級鬼屋「H1」嘅宣傳短片。盛智文最鍾意扮鬼扮馬，今次化身「Zombie Boy」，強迫被綁住手腳、喺片中已經過咗身嘅夏蕙BB紋身。


羅蘭姐第二波廣告現身

好玩得嘅盛智文唔介意全身畫滿「屍紋」，講笑話自己想紋身好耐，但又怕痛喎，今次算係圓咗個心願。兩名「老戲骨」夠晒投入，預告鬼屋入面挑戰感官極限嘅「頭七之旅」，尤其夏蕙BB不停chok陰森樣，都咪話唔驚。


不過，年年有份嘅「聖羅蘭」（羅蘭姐）去咗邊？唔通畀夏蕙BB取代咗？Emily幫大家問過，形象深入民心嘅羅蘭姐會喺第二波廣告現身，好快有得睇。