雅虎原生廣告 收入增14倍

【明報專訊】大家有時上網，可能會見到一啲表明係有啲資訊嘅文章，好似學到啲嘢咁，但最後其實係廣告，呢類「原生廣告」（Native Advertising）查實自從舊年6月，就已經出現喺雅虎，搞足一年後廣告每日平均收入按年升咗14倍，廣告商用喺原生廣告嘅開支，就按年升咗3倍，不過雅虎就點都唔肯講原生廣告收入有幾多。


雖然雅虎十分之口密，密到連原生廣告收入佔整體廣告幾多巴仙都唔肯透露，不過佢就誠意十足請埋早前聲言要攻入香港電視劇市場嘅樂視，去佢銅鑼灣辦公室幫手唱好。樂視除咗講到十分之buy呢類原生廣告，仲話投放喺雅虎嘅廣告開支中，就有八成用喺原生廣告。其實平日上網睇廣告睇到厭，但如果今日有方法令我哋睇完都唔覺睇咗，又能夠令搜索引擎呢啲服務繼續生存嘅話，都未必係一件壞事嘅。


[小琴密語]