【馮仁昭四圍超】二度開騷Sam加辣阿倫笑跳鋼管舞

【蘋果日報】許冠傑（Sam）同譚詠麟（阿倫）噚日以速遞員造型現身半島酒店，為8月5日起一連八埸嘅「阿Sam&阿Tam Happy Together演唱會Part2」舉行記招，佢哋一現身就獻唱三首歌。阿倫話上年Sam只係唱咗三份一金曲，今次會獻唱其餘金曲，Sam仲透露會舊歌譜新詞，為大家帶來新鮮感。
準備200首歌
今次Sam同阿倫準備咗200首歌，Sam話啲歌會唱半首，阿倫表示部份歌曲係每晚唔同，講到要背歌詞，阿倫笑話︰「依家科技進步，要記我唔做喇！」佢又提到Sam要求多加舞蹈同加辣，Sam自言鍾意動感較多，令視覺上好睇好多。阿倫表明當然會一齊跳，問佢係咪化身辣妹拍Sam跳舞？阿倫哈哈大笑說︰「跳鋼管舞呀。」
Sam就希望騷前再減10磅，阿倫就話︰「佢keep fit，我keep fat，佢開口叫我，我一定會減，不過佢冇講，咁大家咪好過啲。」阿倫又大讚Sam人靚聲甜，Sam就指阿倫把口好鬼甜。至於會唔會加開日場，阿Sam就話睇門票賣飛情況再作決定。
撰文：馮仁昭