港鐵換長頸鹿海報 標準不變卻惹誤會

【明報專訊】搭開港鐵嘅市民都會見過入閘機前嘅「長頸鹿」海報，提示小朋友如果高過海報上嘅間尺高度，就要買車票入閘。最近港鐵靜靜雞換咗海報，驟眼望落去同舊款冇分別，都係用長頸鹿做標誌，不過就寫明間尺高度係95厘米。


有眼利嘅網民發現舊款海報有些微轉變，就影咗相擺去網上討論區，點知引來極大迴響，唔知係咪港鐵年年加價，又成日班次延誤，搞到換幅海報都被網民誤會想偷雞賺到盡，有網民喺討論區劈頭話港鐵「改低咗高度」、「變相加價」等，罵聲四起。


不過，其實港鐵嘅「車票發出條件」寫明，小童車票係指3歲或以上嘅小朋友，而身高95厘米或以上嘅小朋友就會自動當係「小童」，即係要買車票，可能高度標準一向缺乏宣傳，所以即使標準多年冇變，都引起今次嘅誤會。