【明報專訊】數近日學界熱話，facebook專頁「名校sex secrets」一定榜上有名。呢個facebook專頁成立不到一周已累積6000多個like。由於當中涉及大膽言論例如SM同分享自己的性經驗，更惹來有家長出post話要「予以強烈譴責」，掀起網友間罵戰；再加上網絡紅人如健吾在自己社交平台轉發，引發更多討論……真係唔睇邊有話題呀？
「若性教育足夠 專頁怎會存在？」
睇番呢個專頁，都係一啲自稱係中學生的網友分享有關性的疑惑。Happy Mama同家計會教育經理李明英傾過，佢認為家長應該持開放態度去睇呢個專頁﹕「家長應該當佢係一個渠道，好好了解時下年輕人對性有咩睇法。家長亦應該問自己，如果年輕人覺得家庭同學校都可以為自己提供足夠嘅性教育，又點會有呢個專頁出現？」李明英認為，社會應該正面接納年輕人對性是好奇的、亦有自己的想法，而不是一開始就持否定的態度。
年輕人都鍾意喺網上搵答案，與其叫佢哋唔好上某啲專頁，不如好好裝備佢哋分辨資訊嘅能力。李明英教路，家長應從小教導仔女要懂得分辨網上信息來源是否可靠，亦唔應該只信賴單一的資訊來源，最好比較多幾個網站的內容。在網上發言時亦應好好保護自己，唔好透露太多個人私隱。
持正面態度才能健康談性
從「名校sex secrets」，大家會知道時下年輕人對性有幾好奇。李明英補充，一個整全的性教育係應該包括知識、態度、價值觀的建立及批判思考的能力，而不是只集中知識層面。家長可以利用一齊睇新聞或者電視劇時，跟子女討論對性的看法，例如﹕「昨日發生咗一單女學生未婚懷孕的新聞，你點睇呀？」過程中，家長應該保持開放態度，多點聆聽子女的想法，而非以一個權威的態度去同仔女溝通。Happy Mama覺得，要同子女做好性教育，家長先要培養自己對性有正面的態度。如果家長自己一提起性，就聯想到「污穢」、「尷尬」，又點同子女健康談性呢？
新聞類別
副刊
詳情#
留言 (0)
