中環在線：猷君現身變蜜糖

【蘋果日報】澳門亞洲娛樂展一向吸引唔少賭業猛人參加，今年自然唔少得「賭王」何氏一族身影，包括澳博（880）候任主席何超鳳同新濠國際（200）主席何猷龍，就連一向甚少理家族事務嘅四房三子何猷君（Mario）都蒲頭，仲大講娛樂與科技，話要將澳門打造成電競比賽嘅IP（知識產權）。
雖然華華一直留心上堂，但Mario嘅魅力實在太吸引，佢貴為四房三太子，高富帥範範中齊不特止，仲係麻省理工高材生，被內地媒體譽為「賭王天才兒子」，唔少女記者、女公關都狂拍片影相（應該係工作用途）。所以呢位城中超級筍盤Mario，應該改名做Super Mario。
講返正題，Mario上年加入咗初創公司創夢天地做首席市場官，有份搞電競，佢就話大陸電競做得好好，但唔夠國際化，而澳門就可以作為突破點，邀請國際電競戰隊到澳門比賽，打通內地同海外市場。
不過，夢想很美好，現實很殘酷，呢位Super Mario最終能否闖關成功，大家惟有拭目以待。
李華華
LiWaWa@AppleDaily.com