立會關canteen 議員忙儲糧

【明報專訊】立法會今日審議政改方案，立法會噚日仲掛上黃色警示， Emily噚日當然要去八卦一下各個議員辦會點樣防備，點知呢兩日議員辦公室「入得」最多嘅物資唔係發電機，而係食物。


今日立法會canteen同5樓咖啡閣全線關閉，秘書處可以幫議員及助理代訂飯盒，但聽聞唔少議員助理都嫌選擇少，無得揀不如唔好訂，聽聞有建制派議辦最近一袋一袋食物咁入貨。不過，法律界議員郭榮鏗嘅議員助理就唔使煩，因為郭榮鏗嘅「前度」、即前法律界議員吳靄儀怕助理們幾日困喺大樓「無啖好食」，噚日就親手整咗啲滷味同蛋糕畀議助醫肚。


立法會所有議員辦事處今日各只獲5個議助入閘返工配額，比之前建制吹風嘅2至3人多，民主黨黨團召集人單仲偕話鬆一口氣。單仲偕話，民主黨嘅政策係，如果職員覺得呢幾日返立會危險，可選擇Home office，但民主黨唔少職員都想見證政改審議，唔畀佢哋返先係無良心，好彩最後配額增至5人，總算人人有工返。