民建聯刊物sell李慧琼「溫婉堅毅並存」

【明報專訊】民建聯今年4月換屆，由41歲女將李慧琼（Starry）接任主席，喺最新一期民建聯會訊、改革後名為《建聞》嘅刊物中，就大sell新主席，唔單止封面封底都有Starry嘅大頭靚相，內頁仲有Starry專訪，以及佢同前主席譚耀宗（譚sir）嘅對談，Starry提到希望有一日民建聯可以派人參加特首選舉。Starry一直被視為未來特首人選之一，唔知佢口中派人參選，會唔會係自己呢？


希望有日民建聯派人選特首

《建聞》有多張民建聯新班子嘅合照，Starry喺一眾男士間特別搶眼。Starry喺專訪中被形容為「溫婉與堅毅並存」，Starry談及同女兒嘅點滴，話早年買龜畀女兒嘅經驗，令佢對龜有種特別感情，仲話常以龜兔賽跑嘅故事鼓勵自己同個女。


Starry喺同譚sir對談中，提到短期內希望可以推動落實普選，以及做好區議會工作，喺保持現有議席下，再有所增長。另外，長期目標就希望有一天民建聯可以派人參加特首選舉，將民建聯嘅治港理念同市民講。