公務員晉升存利益衝突

【明報專訊】負責就公務員招聘、晉升、處罰等提供意見嘅公務員敍用委員會，出咗2014年年報，雖然報告內容好多係公務員制度檢討，但間中透露一啲個案，引起Emily嘅注意。今次報告爆出3宗有潛在利益衝突嘅晉升個案，包括夫婦分別做選拔委員會嘅委員同埋候選晉升人員，雖然有避席，但唔排除有利益衝突風險。


報告話，注意到有兩項唔同嘅晉升選拔工作，相關晉升選拔委員會嘅主席同一位委員，分別申報佢哋配偶係晉升候選人員。雖然兩人都喺選拔委員會討論佢哋配偶晉升條件時避席，公務員敍用委員會亦相信，佢哋喺評審其他人選時可以保持公允持平，但對佢哋配偶嘅競爭對手都係有潛在利益衝突風險，應該更改晉升選拔委員會組合較妥當。


另一宗就係有晉升選拔委員會嘅委員申報，其中一名晉升候選人係佢工作時間以外經常見面嘅朋友，雖然佢申報咗，但仍應該喺討論有關人選嘅晉升條件時暫時避席。