吳秋北﹕唔識扮精明做戲

【明報專訊】工聯會領導層啱啱換屆，會長林淑儀一眾負責人噚日同傳媒茶敘。連任理事長嘅吳秋北一年嚟多次成為新聞焦點，佢噚日就話自己都唔想做焦點。榮譽會長陳婉嫻批評佢欠經驗，秋北噚日話，嫻姐係佢敬重嘅前輩，但佢對嫻姐嘅評論有「另外睇法」。秋北話自己一向唔會喺傳媒面前做無謂「表演」，又舉例話自己就唔會喺標準工時委員會主席梁智鴻後面，大叫當局出賣工人利益。


講到興起，秋北仲話﹕「你叫我扮精明我做唔到，我有人格所在，唔會喺傳媒面前演戲撈取政治曝光。」


特首梁振英（CY）選特首時答應工聯會唔少嘢，包括為研究標準工時立法，搞掂強積金對冲問題等。林淑儀被問如果CY參選仲會否支持，林會長話「真係到佢連任先講」。佢又話CY競選政綱答應唔少事，工聯會會鍥而不捨去追，但淨係爭取立法唔夠，僱主亦要實事求是，希望政府主動拉埋兩邊傾。


會長林淑儀：追CY兌現政綱

林會長都坦言，過去幾年爭取改善勞工福利寸步難行。CY對勞工點真係心照。但目前有39萬幾會員、31名區議員嘅工聯會，似乎仍唔太悲觀，仲打算年底區議會選舉派出超過40人參選。