「如果做特首」 阿松有大計

【明報專訊】政改方案啱啱出爐，被視為下屆特首選舉黑馬嘅前財政司長、南豐集團行政總裁梁錦松，噚日同老友財經事務及庫務局前局長馬時亨一齊出席港大研討會。兩個人都一齊呼籲大家「袋住先」，阿松話個方案未必係最好，但就係政制發展現實下唯一可行嘅方案。


同肥馬齊籲「袋住先」

阿松同馬時亨噚日出席港大「在香港發展金融事業：過去、現在與未來」研討會，向學生分享喺金融界經驗。完場後，阿松被問到如果自己係特首，會點樣向泛民撬票，佢笑笑口話，要睇泛民嘅政治智慧。唔少人都追問阿松會唔會出選特首、覺得自己有無機會出閘，但阿松就無回應喇。


金發局人力資源小組召集人倪以理喺會上講解金發局嘅「發展香港金融服務業人力資源」報告內容，做主持嘅馬時亨笑笑口問阿松，「如果你係特首」，會點樣因應外國人才對國際學校同房屋嘅需要，吸引佢哋嚟香港。阿松話，好早以前已經建議香港起多啲國際學校，不過，佢覺得好多公司都為外國人才提供可觀房屋津貼，所以唔使擔心。阿松反而認為要解決香港市民住屋需求，贊成政府多點搵地起公營房屋。