肥胡復出內地搞醫改

【明報專訊】中國有3座大山難題，分別係醫療、教育、住房。喺中國睇病都幾難，中央政府其實好了解。醫管局前主席胡定旭（肥胡）唔做醫管局之後並唔係裸退，原來佢有新任務，都係同醫療有關。佢話畀Emily知，國務院剛剛聘任佢做國務院深化醫藥衛生體制改革領導小組專家諮詢委員會委員，佢仲係第一個香港人獲得委任。


肥胡係政協常委，對內地政商、民情有一定認識，佢擔任醫管局主席9年咁耐，好明白醫療體制嘅核心問題，加上佢喺醫療界人脈好廣，中央搵佢幫手改革內地嘅醫藥衛生體制，或者都係想佢提出一啲方法移走阻住晒嘅大山。