三料議員羅保爵士逝世

【明報專訊】見證香港回歸嘅政治人物年紀都唔細，最近又有一人去世，佢就係前行政局、立法局、市政局「三料議員」羅保爵士（Sir Rogério Hyndman Lobo），羅保爵士係喺今個月18日病逝，享年91歲。後生一輩可能冇乜聽過佢個名，但喺1984年佢好出名，事關佢當年提出咗著名嘅「羅保動議」，提出任何對香港未來有重大關係嘅事，喺達成任何最終決定前，都要由立法局討論。睇番啲舊文件，呢個動議當年觸動咗中央政府嘅神經，質疑英方利用羅保動議嚟增加談判籌碼。


「羅保動議」曾觸動中央

羅保爵士早於1965年已做市政局議員，開展從政生涯，1980年代中英談判時，佢係立法局首席非官守議員。佢屋企來自葡萄牙，童年於澳門度過，之後嚟咗香港。羅保爵士近年仍活躍喺商界同慈善活動，擔任信德集團同新濠國際嘅獨立非執行董事。


特首梁振英噚日發聲明致哀，話羅保爵士服務香港多年，熱心參與社會事務，亦曾獲委任為廣播事務管理局主席同民眾安全服務隊處長。