首富大排場 保鑣築圍牆

【明報專訊】身家超越馬雲、王健林嘅漢能老總李河君，做咗中國首富之餘，公司股價仲升到好似太陽高掛，市值成3000幾億，但又有班外國佬質疑佢賺錢能力成謎，集咁多話題於一身，令到李河君出現嘅場合頓成鎂光燈焦點；之不過呢名首富個保安級別就同佢身家成正比，亦都愈來愈森嚴。


好似噚日佢出席公司產品發布會，行出行入都有成6、7個保鑣築成圍牆，記者唔單止埋唔到身，就連行近少少舉相機影首富都畀保鑣用手遮擋，好似驚部相機會發射子彈咁。


話時話，李河君唔理記者同埋佢保鑣阻礙記者都唔係第一次，上個月北京兩會，有名香港電視台嘅女行家想追訪準備上車離開嘅李河君，點知走到車旁就被其中一名保鑣一手推開，搞到成個人撞埋車門度，好在女行家有個背囊頂住先冇受傷，但果陣已經令到一眾行家抱怨，睇怕首富響處理媒體關係方面都要好好教育下佢啲保鑣了。


email: piano@mingpao.com

[小琴密語]