曾德成訪南非監獄憶六七

【明報專訊】民政事務局長曾德成早前趁假期到南非旅遊，喺港英年代坐過監嘅佢，坐船去咗開普敦港外嘅羅本島（Robben Island），參觀島上由監獄改裝而成嘅博物館。已故南非前總統曼德拉坐咗27年政治監，當中有18年就係囚禁於羅本島。


德成局長遊監獄都不忘六七暴動往事。香港當年都有囚禁政治犯嘅地方，就係摩星嶺集中營，而政府去年已將摩星嶺批予一家商學院發展校舍。局長噚日就喺網誌借題發揮，批評當年港英政府嘅做法。


局長話，有幾個朋友曾經喺不經檢控判刑情况下，被強行囚禁於摩星嶺，話佢哋無犯任何傷天害理嘅罪行，只為咗愛國，被殖民政府不經審訊單獨囚禁，而囚房24小時電燈長開，令囚犯不斷受到監視嘅巨大心理壓力，而佢呢幾個朋友都已身故。


講番南非嘅博物館，德成局長話，展場最後一個角落展示咗曼德拉語錄，佢最有感覺嘅一句係「我不喜歡任何極端主義」。局長話，曼德拉嘅說話令佢近日常常諗到中國一段傳統論述：「隱惡揚善，執其兩端，用其中於民」 。