嫻姐租車派魚蛋 財爺會撐場

【明報專訊】財政預算案提出研究引入外地流行嘅美食車「Food Truck」，工聯會榮譽會長陳婉嫻要求由財政司長曾俊華親自領軍，認為否則就無辦法協調部門。睇嚟嫻姐「念念不忘、必有迴響」，事關嫻姐4月7日租咗架密斗車，喺「起動九龍東」辦事處外嘅「反轉天橋底一號場」派魚蛋，曾俊華打算親自嚟支持。但由於現時無條例規範Food Truck賣魚蛋，所以今次只係示範，唔會收錢。


曾司長早前話，會將呢件事交畀商務及經濟發展局長蘇錦樑（Greg So）研究，但嫻姐當時當面篤爆話Greg So之前同佢講「唔關佢事」。嫻姐噚日話都有邀請Greg So嚟參加呢個活動，但對方話當日唔喺香港，嚟唔到。


嫻姐又話最近有個社會學教授帶咗佢去睇電影The Hunger Games，令佢有反思，就算面對生死存亡，都可以諗到好多方法解決問題。係咪即係話電影所指，好似香港今日情况？佢話「你畀我再思考吓」，但認同唔應該樣樣由成年人諗，要用年輕人角度去諗問題。