呂良偉周海媚攬腰合照

【明報專訊】呂良偉、周海媚（海味）及鄭佩佩昨出席「香港影視娛樂博覽」項目「電影世界2015」開幕典禮，同獲頒「英藝獎」。過氣情侶阿呂和海味再碰頭全無芥蒂，有講有笑還攬腰合照。


阿呂表示已兩、三年無見海味，但對方參演的劇集《武媚娘》最近在內地播映，自己都有收看支持。對於《武》劇遷就電視尺度而刪走女角騷胸鏡頭變「大頭版」，海味認為﹕「忠於唐朝歷史，戲服過於性感都無壞，個劇好有誠意，場景又靚，不過畫面剪裁拉高了，都好睇的。」阿呂和應﹕「人靚點都好睇！有得睇是觀眾福氣，不覺得過分賣弄，不過電視入屋就會嚴少少。」


阿呂指與海味也尚未退休，大家未來可能有合作機會。已升呢做製作人的海味透露明年會有計劃，可以找個時間跟阿呂洽商。阿呂說﹕「好的，海味製作電視劇，我就製作電影。」談到得獎，獲表揚作為香港藝人在內地發展成績出色，阿呂感到高興﹕「香港好多演員到內地發展都有成績，只是我們3個做代表，聽到好多內地製作人都覺得香港藝人專業、有道德、準時、尊重其他崗位，可說是平靚正，有時拍攝差一兩個鏡頭，都留下來完成，有專業精神。」


海味領獎﹕大家詫異我點解消失

海味上台接受獎項時更激動眼濕濕，因為今年適逢是其入行30周年，她說﹕「我的歷程是起承轉合，由演憐家妹妹角色，長大後演女人味、少少性感角色，2003年我一個人到內地發展找方向，大家都詫異我點解消失，以為我退出，到現在可以融合香港和內地文化。」而鄭佩佩就獲兩個乖女原麗淇、原子穗吻賀。


記者﹕鍾一虹

■更多娛樂猛料 ﹕ol.mingpao.com