湯家驊忽然道歉

【明報專訊】曾經表示「謙卑」唔係佢強項嘅公民黨湯家驊（Ronny），噚日忽然向港大法律係教授、基本法委員陳弘毅，同埋公民黨黨魁梁家傑道歉！

Ronny喺政改問題上，同公民黨以至泛民嘅立場唔多同，仲曾經批評泛民欠缺「政治智慧」，前日佢出席一個電台節目時就批評，陳弘毅提出公開辯論政改係「幼稚」、「無稽」。


不過，事隔一日Ronny就解釋，自己其實係想話，公開政改辯論不單對政改無幫助，仲可能將市民視線轉往辯論輸贏，甚至令大家認為喺政改上唔使作出任何退讓，都可解決問題。Ronny話，如果辯論目的係令各方了解相關立場，辯論有好處；佢又承認自己用詞「過於強烈」，向提出辯論建議嘅陳弘毅同支持搞辯論嘅梁家傑致歉。